کابل(سچ نیوز) گزشتہ روز عمران خان نے امریکی صدر کی ہرزہ سرائی کا جواب دیتے ہوئے کہا تھا کہ امریکہ تمام تر وسائل کے باوجود افغانستان میں طالبان کو شکست نہیں دے سکا۔ اب وہی بات افغانستان میں تعینات امریکی جنرل نے بھی کہہ ڈالی ہے۔ ساﺅتھ ایشین مانیٹر کے مطابق جنرل جوزف ڈنفرڈ نے کہا ہے کہ ”افغانستان میں طالبان ابھی شکست سے بہت دور ہیں۔وہ جنگ نہیں ہار رہے اور ملک میں امن قائم کرنے کے لیے ہمیں ابھی بہت کچھ کرنے کی ضرورت ہے۔“کینیڈا میں ہونے والے ایک سکیورٹی فورم سے خطاب کرتے ہوئے جنرل جوزف کا مزید کہنا تھا کہ ”افغانستان میں ہم ایک سال قبل ایک جگہ ساکت ہوجانے کی اصطلاح استعمال کرتے تھے۔ ہم آج بھی اسی جگہ پر کھڑے ہیں اور اس سے آگے نہیں بڑھ پا رہے۔افغانستان میں قیام امن کے لیے کوئی فوجی حل نہیں ہے۔ چنانچہ امریکہ اور نیٹو اتحادی فوجی طاقت کو بڑھانے کے ساتھ ساتھ سیاسی اور معاشی دباﺅ بھی بڑھا رہے ہیں تاکہ طالبان کو مذاکرات پر رضامند کیا جا سکے، کیونکہ اس مسئلے کا حل سیاسی مذاکرات سے ہی ممکن ہے۔“
