کرناٹک(سچ نیوز) بھارتی ریاست کرناٹکا میں 5 منزلہ زیر تعمیر عمارت اچانک منہدم ہوگئی جس کے نتیجے میں 2 افراد ہلاک اور 19 زخمی ہوگئے جب کہ عمارت کے ملبے میں 40 افراد کے دبے ہونے کا خدشہ ہے.بھارتی نجی ٹی وی چینل ’’زی نیوز‘‘ کے مطابق کرناٹکا کے ضلع دھرود میں 5 منزلہ زیر تعمیر عمارت گر گئی، عمارت کے ملبے سے 2 افراد کی لاشوں کو نکالا جا چکا ہے جب کہ 19 زخمیوں کو ضلعی ہسپتال منتقل کیا گیا ہے، اب بھی ملبے تلے 40 افراد کے دبے ہونے کا خدشہ ہے۔امدادی اداروں نے کاموں کا آغاز کرتے ہوئے ہلاک اور زخمی ہونے والوں کو دھرود کے ضلعی اور سول ہسپتال منتقل کیا ہے۔ 19 زخمیوں میں سے 6 کی حالت نازک بتائی جارہی ہے۔ ہسپتال میں ایمرجنسی نافذ کردی گئی ہے اور لوگوں سے خون کے عطیے کی درخواست کی گئی ہے، زخمیوں کی حالت تشویش ناک ہونے کے سبب ہلاکتوں میں اضافے کا خدشہ ہے۔پولیس کا کہنا ہے کہ پہلی ترجیح امداد کی فراہمی ہے، عمارت کے منہدم ہونے کی وجہ کا فوری طور پر تعین نہیں کیا جاسکا۔ پانچ منزلہ عمارت کا بڑا حصہ زیر تعمیر تھا جب کہ کچھ حصے میں لوگ رہائش پذیر تھے۔ انتظامیہ کا کہنا ہے کہ امدادی کارروائیاں رات بھر جاری رہیں گی
