مسجد آنے کیلئے اجازت ضروری،کورونا ایس او پیز پر عملدرآمد میں سختی عمرے کے دوسرے مرحلے کا آغاز،مسجد اقصیٰ بھی نمازیوں کیلئے کھل گئی
مدینہ ،مکہ (سچ نیوز)عمرہ پروگرام کے دوسرے مرحلے کے آغاز کے ساتھ مسجد نبوی اور روضہ رسول ﷺ بھی معتمرین کیلئے کھل گئے ۔سعودی حکام کے مطابق معتمرین کو سخت کورونا ایس او پیز کے ساتھ یکم ربیع الاول سے روضہ رسول ﷺ کی 75 فیصد تک گنجائش کے حساب سے زیارت کی اجازت دی گئی ہے ۔مسجد نبوی کی انتظامیہ اور سکیورٹی اہلکاروں کو روضہ رسول ﷺمیں نمازونوافل اور صلوٰۃ و سلام کیلئے آنیوالے زائرین کو منظم کرنے کی ذمہ داریاں سونپی گئی ہیں۔ انتظامیہ کے مطابق مسجد نبوی میں نماز اور روضہ رسول ﷺ کی زیارت کے خواہشمند معتمرین کو ایپ کے ذریعے اجازت نامہ حاصل کرناہوگا،بلا اجازت کسی کو مسجد آنے نہیں دیاجائے گا۔سات ماہ بعد روضہ رسول ﷺ کھلنے پر جذباتی مناظر دیکھے گئے ۔دوسری طرف سعودی حکام نے بتایاکہ عمرہ پروگرام کا دوسرا مرحلہ گزشتہ روز شروع کردیا گیا ہے ۔حرم مکی کی 75 فیصد گنجائش کے مطابق عمرے کے اجازت نامے جاری کئے جا رہے ہیں، مسجد الحرام میں خواتین نمازیوں کیلئے جگہیں مختص کی گئی ہیں ،جبکہ صحت و صفائی کے اعلیٰ انتظامات کئے گئے ہیں۔دوسرے مرحلہ میں ڈھائی لاکھ مقامی شہریوں اور سعودی عرب میں مقیم غیر ملکیوں کو عمرے کی اجازت ہو گی۔سعودی وزارت حج و عمرہ کے مطابق زائرین کو ایپ کے ذریعے اجازت نامہ حاصل کرناہوگا۔ عمرہ پروگرام کے دوسرے مرحلے میں 2 لاکھ 20 ہزار عمرہ زائرین اور 5 لاکھ 60 ہزار نمازی مسجد الحرام آئیں گے ۔ دوسرا مرحلہ 14 روز تک جاری رہے گا جس کے بعد تیسرا مرحلہ شروع ہوگا جس میں غیر ملکیوں کو بھی عمرے کی اجازت دی جائے گی ۔واضح رہے 4 اکتوبر کو 7 ماہ کے تعطل کے بعد معتمرین نے خانہ کعبہ کا طواف کیااور پہلی بارعمرہ ادا کیا۔ادھر قابض اسرائیلی فورسز نے کورونا کے نام پر 30دن سے بند مسجد اقصیٰ گزشتہ روزفجر کے وقت نمازیوں کیلئے کھول دی ۔
