ڈانسر سپنا چوہدری کا لیجنڈری اداکارہ اور بی جے پی امیدوار ہیما مالنی کے خلاف الیکشن لڑنے کا امکان

نئی دلی (سچ نیوز) ہریانہ سے تعلق رکھنے والی سوشل میڈیا سٹار اور ڈانسر سپنا چوہدری کے لیجنڈری اداکارہ اور بی جے پی امیدوار ہیما مالنی کے خلاف الیکشن کے میدان میں اترنے کا امکان ہے۔بھارتی ٹی وی نیوز 18 نے ذرائع کے حوالے سے دعویٰ کیا ہے کہ بالی ووڈ کی ڈریم گرل ہیما مالنی بی جے پی کی جانب سے ریاست اترپردیش کے حلقے متھرا سے انتخابی میدان میں اترنے جارہی ہیں۔ کانگریس کی جانب سے ہیما مالنی کے مقابلے میں سپنا چوہدری کو اتارے جانے کا امکان ہے۔نیوز 18 کے مطابق سپنا چوہدری گزشتہ ڈیڑھ ماہ سے کانگریس کی مرکزی قیادت سے رابطے میں ہیں اور انہیں کانگریس کے ہیڈ کوارٹر میں بھی دیکھا گیا ہے۔ ذرائع نے امکان ظاہر کیا ہے کہ اگر کانگریس نے سپنا چوہدری کو میدان میں اتارا تو لوک سبھا کی اس نشست پر دونوں سلیبریٹیز میں کافی دلچسپ مقابلہ ہوسکتا ہے۔خیال رہے کہ 28 سالہ سپنا چوہدری کا تعلق بھارتی ریاست ہریانہ سے ہے ۔ انہوں نے عوامی جلسوں میں رقص کے ذریعے شہرت کمائی ہے، وہ کلرز ٹی وی کے بگ باس سیزن 11 میں شرکت کرچکی ہیں ۔ انہوں نے بالی ووڈ میں بعض آئٹم نمبر بھی کیے ہیں۔