واشنگٹن (سچ نیوز)امریکہ کے سیکریٹری آف سٹیٹ مائیک پومپیو نے بیت المقدس (یروشلم) میں قائم فلسطین کے امور سے متعلق دفتر کو اپنے متنازع سفارت خانے میں ضم کرنے کا اعلان کر دیا۔غیر ملکی میڈیا کے مطابق مائیک پومپیو نے کہا کہ امریکی قونصل جنرل کو ماضی میں فلسطینیوں سے معاملات نمٹانے کے لیے الگ دفتر قائم کیا گیا تھا جس کو اب سفارت خانے کے اندر فلسطینی امور یونٹ میں تبدیل کردیا جائیگا۔ امریکہ واحد بڑی طاقت ہوگی جو فلسطینیوں کے حوالے سے بغیر کسی خاص نمائندہ دفتر کے رہ جائے گا۔فلسطین لبریشن آگنائزیشن (پی ایل او) نے اس اقدام کی فوری طور پر مذمت کی ہے ۔ امریکی سیکریٹری خارجہ نے ایک بیان میں کہا کہ یہ فیصلہ ہمارے کام کو دنیا بھر میں موثر اور بہتر بنانے کی ہماری عالمی کوششوں کی جانب اقدام کے طور پر کیا گیا ہے، یہ یروشلم، مغربی کنارے اور غزہ کی پٹی کے ساتھ امریکی پالیسی میں تبدیلی کا کوئی اشارہ نہیں ہے۔انہوں نے کہاکہ امریکہ نے اسرائیلی اور فلسطینیوں کے درمیان امن معاہدے کو کیسے عملی شکل دی جائے اس حوالے سے کوئی پوزیشن نہ لینے کے فیصلے کو جاری رکھا ہوا ہے۔انہوں نے کہا کہ انتظامیہ پائیدار اور عملی امن حاصل کرنے کیلئے پرعزم ہے جو اسرائیل اور فلسطین کے شاندار مستقبل کیلئے ضروری ہے۔
