اسلام آباد(سچ نیوز)چیف جسٹس سپریم کورٹ اور وزیراعظم عمران خان کے قائم کردہ ’’ڈیمز فنڈ ‘‘ میں ملک بھر کے عوام اور اداروں کی جانب سے عطیات جمع کرنے کا سلسلہ زور و شور سے جاری ہے،اب خبر آئی ہے کہ ایئر چیف مارشل نے چیف جسٹس میاں ثاقب نثار کو’’ ڈیمز فنڈ‘‘ کے لئے دس کروڑ روپے کا چیک پیش کیا ہے ۔نجی ٹی وی چینل کے مطابق چیف جسٹس آف پاکستان جسٹس میاں ثاقب نثار نے پاکستان ایئرفورس (پی اے ایف) کپملیکس اسلام آباد کا دورہ کیا، اس موقع پر ایئر چیف مارشل نے چیف جسٹس کوڈیمز فنڈ کے لیے دس کروڑ روپے کا چیک پیش کیا۔ترجمان سپریم کورٹ کے مطابق چیف جسٹس نے ایئر چیف مارشل مجاہد انور خان کی درخواست پر پی اے ایف کپملیکس کا دورہ کیا، اس موقع پر چیف جسٹس میاں ثاقب نثار نے ایئرفورس افسروں کو ملک میں عدلیہ کے کردار پر لیکچر بھی دیا۔ ایئرچیف مارشل مجاہد انور خان نے چیف جسٹس اور سپریم کورٹ کے ڈیمز کی تعمیر کے لیے اقدامات کو سراہتے ہوئے دیامر اور مہمند ڈیمزفنڈ کے لئے ائیر فورس کی جانب سے دس کروڑ روپے کا عطیہ پیش دیا۔واضح رہے کہ اس سے قبل گذشتہ ماہ پاک فوج کے سربراہ جنرل قمر باجوہ نے بھی چیف جسٹس سے ملاقات کرتے ہوئے ڈیمز فنڈز کے لئے ایک ارب 59 لاکھ روپے کا چیک پیش کیا تھا ،پاک فوج کے تمام افسران کی جانب سے دو دن جبکہ سپاہیوں کی طرف سے ایک دن کی تنخواہ ڈیمز فنڈ میں جمع کرائی گئی تھی۔
