اسلام آباد: (سچ نیوز) وفاقی وزیر برائے منصوبہ بندی و ترقی مخدوم خسرو بختیار نے کہا ہے کہ موجودہ حکومت سی پیک منصوبے سے زیادہ سے زیادہ فائدہ اٹھانے کیلئے روڈ اور ریل انفراسٹرکچر کو جدید خطوط پر استوار کرنے پر توجہ دے رہی ہے۔
اسلام آباد میں ایف ڈبلیو او کے ڈائریکٹر جنرل میجر جنرل انعام حیدر ملک نے وزیر منصوبہ بندی مخدوم خسرو بختیار سے ملاقات کی۔ اس موقع پر وفاقی وزیر نے کہا کہ موجودہ حکومت سی پیک منصوبے سے زیادہ سے زیادہ فائدہ اٹھانے کیلئے روڈ اور ریل انفراسٹرکچر کو جدید خطوط پر استوار کرنے پر توجہ دے رہی ھے۔
انہوں نے کہا کہ قومی تعمیر و ترقی اور قومی اہمیت کے بڑے منصوبوں کی تکمیل میں ایف ڈبلیو او کا کردار بہت اھم ہے۔ وفاقی وزیر نے گوادر کے مقامی لوگوں کو صاف پانی مہیا کرنے کیلئے 4.4 ملین گیلن کے صاف پانی کے پلانٹ کو مقررہ وقت میں مکمل کرنے پر زور دیا۔
وفاقی وزیر نے متعلقہ حکام کو مقامی آبادی کی ضروریات پورا کرنے کیلئے گوادر میں مزید یومیہ پانچ ملین گیلن کے صاف پانی کا پلانٹ نصب کرنے کے حوالے سے دستاویزات تیار کرنے کی بھی ہدایت کی۔
خسرو بختیار کا کہنا تھا کہ سی پیک کے تحت انفراسٹرکچر کے منصوبوں کی تکمیل میں ایف ڈبلیو او اہم کردار ادا کر رہا ہے۔ ملاقات کے دوران ڈائریکٹر جنرل ایف ڈبلیو او نے وفاقی وزیر کو ترقیاتی منصوبوں پر جاری کام کی پیشرفت اور تفصیلات سے بھی آگاہ کیا۔
