لاہور(سچ نیوز)امیر جماعت اسلامی پاکستان سینیٹر سراج الحق نے کہاہے کہ پوری قوم تحفظ ختم نبوتﷺ کے قانون کا دفاع کرے گی،ناموس رسالتﷺ قوانین پر معذرت خواہانہ رویہ اختیار کرنے کی بجائے پوری ایمانی قوت اور حمیت سے ڈٹنے کی ضرورت ہے ،ریاست اس قانون کی اونر شپ قبول کرے اور جس طرح دہشتگردی کے قوانین پر سختی سے عملدرآمد کیا جاتا ہے ،اس سے بڑھ کر 295 سی پر عملدرآمد کیا جائے کیونکہ توہین رسالتﷺ سے بڑھ کر کوئی دہشتگردی نہیں ہے ۔
منصورہ میں عالمی مجلس ختم نبوت کے مرکزی رہنما مولانا اسماعیل شجاع آبادی اور مولانا عزیز الرحمن ثانی کی قیادت میں ملنے وفد سے ملاقات کے موقع پر گفتگو کرتے ہوئے سینیٹر سراج الحق نے کہاکہ ختم نبوت اور تحفظ ناموس رسالتﷺ کے قوانین کی حفاظت ہم اپنی جان سے بڑھ کر کریں گے ،مغرب زدہ این جی اوز اسلام دشمن ایجنڈے پر کاربند ہیں ان کا ایک ہی ایجنڈا ہے کہ اظہار رائے کی آزادی کی آڑ میں نبی آخر الزمان حضرت محمدﷺکی اہانت ( نعوذ باللہ ) کر کے مسلمانوں کی عقیدت و محبت کے مرکز پر حملہ کیا جائے اور ان سے رسولﷺکی محبت اور ایمان کی دولت چھین لی جائے ۔ انہوں نے کہاکہ مغرب اور مغربی میڈیا ہمارے آئین و دستور سے اسلامی دفعات کو ختم کر نے کے لیے زہریلا پراپیگنڈا کرتاہے اور مغربی ڈالرز پر پلنے والی این جی اوز اس ایجنڈے کی تکمیل کے لیے بے بنیاد ایشو اٹھا کر عوام کو گمراہ کرتی ہیں ۔ سینیٹر سراج الحق نے کہاکہ حکومت کو آئین اور اس کی اسلامی دفعات کی حفاظت پر کسی مصلحت کا شکار نہیں ہونے دیں گے ،پاکستان کے اکیس کروڑ عوام اسلام اور نبی مہربان ؐ کی ناموس کے تحفظ پر جانیں نچھاور کرنے کو اپنی سعادت سمجھتے ہیں ۔
