اسلام آباد: (سچ نیوز) تحریک انصاف کو ٹف ٹائم دینے کے لئے مسلم لیگ ن متحرک ہو گئی ہے۔ پارلیمنٹ کے اندر اور ضمنی انتخابات میں ن لیگ کا ساتھ دینے کے لئے سابق وزیرِاعظم نواز شریف نے سابق صدر آصف زرداری سے مدد مانگ لی۔
ذرائع کے مطابق راجا ظفر الحق کی قیادت میں ن لیگ کے وفد نے پیپلز پارٹی کے سیکرٹری جنرل نیر بخاری سے اہم ملاقات کر کے میاں نواز شریف کا پیغام پہنچایا۔
ملاقات میں پارلیمنٹ میں اپوزیشن کا کردار اور ضمنی انتخابات میں مشترکہ امیدوار لانے سے متعلق امور پر تبادلہ خیال کیا گیا۔ ذرائع کے مطابق راجا ظفر الحق نے مشترکہ امیدوار لانے کے لئے پیپلز پارٹی کو درخواست کی۔
راجہ ظفرالحق کا کہنا تھا کہ متحدہ اپوزیشن کے تحت پارلیمنٹ کے اندر اور باہر موثر انداز میں آواز بلند کی جا سکتی ہے۔ شہباز شریف کل اسلام آباد پہنچ رہے ہیں، مسلم لیگ ن اور پیپلز پارٹی کے درمیاں رابطے مزید بڑھیں گے۔ انہوں نے کہا کہ ملاقات سے متعلق میاں نواز شریف کو بھی بریفنگ دوں گا۔
پیپلز پارٹی کے سیکرٹری جنرل نیر بخاری کا کہنا تھا کہ پی پی پی کی جمہوریت کی مضبوطی تسلسل کے لیے کردار تاریخی ہے۔ بلاول بھٹو کی قیادت میں پی پی پی پارلیمنٹ میں مدبرانہ کردار ادا کر رہی ہے۔
نیر بخاری کا کہنا تھا کہ پارلیمنٹ میں متحدہ اپوزیشن اور ضمنی انتخابات میں مشترکہ امیدوار کھڑے کرنے سے متعلق ن لیگ کا موقف پارٹی قیادت کے سامنے رکھا جائیگا۔ پارٹی قیادت سے مشاورت کے بعد ن لیگ کو حتمی فیصلے سے متعلق آگاہ کیا جائیگا۔
