اسلام آباد(سچ نیوز) وفاقی وزیر اطلاعات فواد چودھری نے کہاہے کہ دوتین ہفتے ٹھہرجائیں ، جب آصف زرداری کے مزید اکاﺅنٹس کا انکشاف ہوگا تو بلاول بھٹو زرداری کوحکومت پر تنقید کرنے مزید موقع ملے گا ، پیپلزپارٹی والے چاہتے ہیں کہ ایف آئی اے سپریم کورٹ کی بجائے ان کے ساتھ کھڑی ہو ۔جیونیوز کے پروگرام ”آج شاہ زیب خانزادہ کے ساتھ“ میں گفتگو کرتے ہوئے فواد چودھری نے کہا کہ پیپلزپارٹی چاہتی ہے کہ احتساب نہ ہوا اور آصف زرداری کے اکاﺅنٹس نہ کھولے جائیں ۔ انہوں نے کہا کہ آصف زرداری اور نواز شریف کا ایک ہی مسئلہ ہے کہ ان کے اکاﺅنٹس کو نہ چھیڑا جائے ، اگر آپ ان کو نہیں چھیڑتے تو حکومت بھی ٹھیک ہے اور جمہوریت بھی اور اگر ان کے چھیڑا جائے گا تو حکومت بھی نا اہل ہے اور جمہوریت بھی خطرے میں پڑ جائے گی ۔ انہوں نے کہا کہ دوتین ہفتے ٹھہر جائیں جب آصف زرداری کے مزید اکاﺅنٹس کا انکشاف ہوگا تو بلاول کو حکومت پر تنقید کرنے کا مزید موقع ملے گا ۔ ان کا کہنا تھا کہ پیپلزپارٹی چاہتی ہے کہ سپریم کورٹ جو تحقیقات کررہی ہے وہ روکی جائیں اور ایف آئی اے سپریم کورٹ کی بجائے پیپلز پارٹی کے ساتھ کھڑی ہو ۔ انہوں نے کہا کہ ہم سمجھتے ہیں کہ غداریوں کے مقدمے نہیں ہونے چاہئے ، پبلک اکاﺅنٹس کمیٹی کا سربراہ شہباز شریف کے بننے کی صورت میں ہم کو بہت سے تحفظات ہیں۔ انہوں نے کہا کہ حکومت کے پراجیکٹس کا اگر اپوزیشن آڈٹ کرے تو انصاف کی بات ہے لیکن اب اگر نوازشریف کے پراجیکٹس کا آڈٹ شہبازشریف کریں تو یہ انصاف کے تقاضوں کے خلاف ہے ، اس پر بات ہورہی ہے ، ایک طریقہ کار ہونا چاہئے جس پر انصاف کے کم از کم تقاضے پورے ہوسکیں۔ان کا کہنا تھا کہ ہر واقعے کی تحقیقات ہونی چاہئے ۔
