لاہور (سچ نیوز) 8 سالہ ہادیہ ہاشمی کا ’نیس کیفے بیسمنٹ‘ میں گایا گانا سامنے آیا تو پاکستان بھر میں دھوم مچ گئی اور ہر کوئی دل کھول کر انہیں داد دینے پر مجبور ہو گیا۔ہادیہ ہاشمی کے گلے سے بھلے ہی ’بڑی‘ آواز نکلتی ہے مگر وہ ہیں تو ننھی منی سی بچی، اس لئے ان کے انداز بھی معصوم ہے اور خواہشات بھی لیکن ایک خواہش تو اتنی معصوم ہے کہ جان کر آپ کو بے اختیار ہنسی آ جائے گی اور ان پر خوب پیار بھی آئے گا کہ بچے واقعی من کے سچے ہوتے ہیں۔غیر ملکی خبر رساں ادارے کو دئیے گئے انٹرویو میں ہادیہ ہاشمی نے کہا کہ میری سہیلیاں پوچھتی ہیں کہ تم اپنے گلے سے ایسی آواز کیسے نکالتی ہو تو میں کہتی ہوں کہ اللہ تعالیٰ نے مجھے ایسی آواز دی ہے، جب زلفی بھائی میرا آڈیشن لینے آئے تو سب سے آخر میں میری باری تھی، میں نے سجاد علی کا گانا گایا تو وہ رونے لگے اور ان سے بات ہی نہیں کی گئی۔ہادیہ کے موسیقی کے استاد نے ان کی دلچسپ خواہش کے بارے میں بتاتے ہوئے کہا کہ ”ہادیہ کا بچپنا میں بہت انجوائے کرتا ہوں، اس کی ایک خواہش یہ ہے کہ اس کا گانا ’ڈورے مون‘ سن لے اور ساتھ وہ یہ بھی کہتی ہے کہ زیادہ نہ سنے کیونکہ پھر وہ کارٹون بنانا چھوڑ دے گا اور صرف میری آواز ہی سنتا رہے گا۔“ہادیہ کہتی ہیں کہ میں ڈاکٹر بھی بنوں گا اور گلوکارہ بھی کیونکہ مجھے موسیقی اتنی اچھی لگتی ہے کہ اگر کوئی مجھے موسیقی چھوڑنے کو کہے تو میں کبھی نہیں چھوڑوں گی۔
