لاہور (سچ نیوز) پاکستان تحریک انصاف (پی ٹی آئی) عام انتخابات میں برتری حاصل کرنے والی جماعت بن کر سامنے آئی ہے تاہم دیگر سیاسی جماعتوں کی جانب سے انتخابی نتائج مسترد کر دئیے گئے ہیں۔
آج ہونے والی آل پارٹیز کانفرنس میں جمعیت علمائے اسلام (جے یو آئی)ف اور مسلم لیگ (ن) سمیت دیگر سیاسی جماعتوں نے انتخابی نتائج کو عوامی مینڈیٹ پر ڈاکہ قرار دیتے ہوئے حلف نہ اٹھانے اور دوبارہ انتخابات کیلئے تحریک چلانے کا اعلان کیا ہے۔سیاسی جماعتیں تو تحریک انصاف پر دھاندلی کے الزامات عائد کر رہی ہیں مگر اب بیلٹ پیپرز کی چند تصاویر سوشل میڈیا پر وائرل ہو گئی ہیں جن کی بنیاد پر یہ کہا جا رہا ہے
کہ مسلم لیگ (ن) دھاندلی کی وجہ سے نہیں بلکہ جہالت کی وجہ سے ہاری ہے کیونکہ ان کے ووٹرز بیلٹ پیپر پر ایسے کام کرتے رہے کہ ووٹ ہی مسترد ہو گئے۔
ان تصاویر میں دیکھا جا سکتا ہے کہ مسلم لیگ (ن) کو ووٹ دینے والے ووٹر نے شیر کے نشان پر مہر لگانے کے بعد بلے کے نشان پر پنسل سے کانٹا لگا دیا۔ یہ کام وفاقی اور صوبائی نشست کیلئے استعمال ہونے والے دونوں بیلٹ پیپرز پر کیا گیا اور الیکشن کمیشن کے قوانین کے مطابق مہر کے علاوہ بیلٹ پیپر پر کوئی اور نشان ہونے کے باعث ووٹ مسترد ہو جاتا ہے۔ بیلٹ پیپرز کی ان تصاویر میں کتنی سچائی ہے؟ اس بارے وثوق سے تو کچھ نہیں کہا جا سکتا لیکن اگر ایسا ہوا ہے تو کسی جماعت کو چاہے ہزاروں ووٹ ملے ہوں، مسترد ہی تصور کئے جاتے ہیں۔
