پاک، چین دوستی بس کا کرایہ کتنا ہو گا اور کن علاقوں سے گزرے گی؟ وہ تمام تفصیلات جو آپ جاننا چاہتے ہیں

لاہور (سچ نیوز) پاکستان اور چین کے درمیان دوستی بس سروس کا آغاز ہونے جا رہا ہے جسے دونوں ممالک کے درمیان ایک اور اہم سنگ میل قرار دیا گیا ہے۔ پاک چین دوستی بس پنجاب کے دارالحکومت لاہور کے معروف لبرٹی چوک سے رات 11 بجے روانہ ہوگی جو مسافروں کو لے کر پہلے اسلام آباد پہنچے گی۔راولپنڈی اور اسلام آباد کے مسافروں کو لینے کیساتھ ساتھ یہاں چائے کیلئے قیام کیا جائے گا جس کے بعد بس اپنی منزل کی جانب آگے بڑھتے ہوئے مانسہرہ پہنچے گی جہاں صبح کا ناشتہ کیا جائے گا۔پاک چین دوستی بس کا اگلا سٹاپ خیبرپختونخوا کے علاقے بشام میں ہوگا، جہاں کچھ دیر قیام کرنے اور کھانے کے بعد بس گلت بلتستان کی جانب روانہ ہوگی۔اس کے بعد چلاس کے علاقے میں قیام کیا جائے گا جہاں چائے پی جائے گی جبکہ اس کے بعد گلگت پہنچ کر کھانے کا وقفہ کیا جائے اور یہاں کچھ دیر آرام بھی کیا جائے گا۔گلگت کے بعد بس ہنزہ کی جانب روانہ ہوگی اور سست بارڈر پر مسافروں کا امیگریشن کیا جائے گا، جس کے بعد انہیں خنجراب پاس لے جایا جائے گا جہاں سے وہ چین میں داخل ہوجائیں گے، چین میں پاکستانیوں کی منزل چین کا علاقہ کاشغر ہوگا۔بس سروس کے ذریعے چین کا دورہ کرنے والے افراد کیلئے ایک طرف کا ٹکٹ 13 ہزار روپے ہے جبکہ دونوں جانب کا ٹکٹ (ریٹرن ٹکٹ) 23 ہزار روپے ہے۔بس سروس کمپنی کے چیف ایگزیکٹو افسر (سی ای او) محمد انور نے اس کاوش کو سہراتے ہوئے کہا کہ بس میں مسافروں کے لیے تمام سہولیات مہیا کی جائیں گی۔انہوں نے مزید کہا کہ مسافروں کے لیے کھانے پینے کا بھی انتظام کیا گیا ہے۔خیال رہے کہ وزیرِاعظم عمران خان اس وقت چین کے دورے پر ہیں جنہوں نے وہاں مختلف فورمز پر واضح طور پر کہا ہے کہ دونوں ممالک کے عوام کے درمیان بھی روابط کو مزید بہتر بنانے کی ضرورت ہے، جس کے لیے ویزا پالیسی میں بھی بہتری کی جانی چاہیے۔