اسلام آباد: (آن لائن) پاکستان کرکٹ بورڈ کے چیئرمین احسان مانی نے کہا ہے کہ پاک بھارت کرکٹ سیریز بحالی سے دونوں ممالک کے درمیان تعلقات میں بہتری آئے گی، سیریز کھیلنے کیلئے بھارت سے بھیک نہیں مانگیں گے، پاکستان کرکٹ کی بہتری کیلئے ہر ممکن اقدامات کروں گا۔
ایک انٹرویو میں چیئرمین پاکستان کرکٹ بورڈ (پی سی بی ) احسان مانی کا کہنا تھا کہ دونوں ممالک کے شائقین پاک بھارت میچز کی بحالی کے خواہاں ہیں، میں سمجھتا ہوں کہ دونوں ممالک کے درمیان سیاسی کشیدگی کو کم کرنے کیلئے بھی اس سے بہتر کوئی راستہ نہیں، ماضی میں جب بھی بھارتی شائقین ٹیم کےساتھ پاکستان آئے تو ہماری مہمان نوازی سے متاثر ہو کر ہر کوئی خوشی خوشی سے واپس گیا۔
انہوں نے کہا کہ پاک بھارت میچز سے پوری دنیا کو معاشی طور پر بھی بہت فائدہ ہوتا ہے کیونکہ دونوں ممالک کے درمیان میچز سب سے زیادہ دیکھے جاتے ہیں، ہمارے لئے پیسہ اہم نہیں، ہم صرف دونوں ممالک کے درمیان کرکٹ سیریز کی بحالی چاہتے ہیں اور اس کیلئے ہم ہر فورم پر بھارت سے بات چیت کیلئے تیار ہیں۔
انہوں نے کہا کہ بھارت سے سیریز کھیلنے کیلئے اس کے پیچھے نہیں بھاگیں گے، اگر وہ کھیلنے کیلئے تیار ہے تو بتائے، اگر وہ نہیں کھیلنا چاہتے تو پھر بھی ٹھیک ہے لیکن ہم اسے مجبور نہیں کریں گے اور نہ ہی بھیک مانگیں گے۔احسان مانی نے کہا کہ بھارت آئی سی سی اور دوسرے ٹورنامنٹس میں پاکستان کےخلاف کھیلتا ہے صرف باہمی سیریز نہیں کھیلتا ہمیں اس پر بات کرنے کی ضرورت ہے۔ انہوں نے کہا کہ پاکستان کرکٹ کی بہتری کیلئے ہر ممکن اقدامات کروں گا۔
