اسلام آباد(سچ نیوز) پاکستان تحریک انصاف کے رہنما اور ممبر قومی اسمبلی صداقت علی عباسی نے کہا ہے کہ کچھ چیزیں آئینی اور قانونی نہیں بلکہ اخلاقی ہوتی ہیں، اخلاقیات کا خیال رکھنا چاہیے،شہباز شریف کو پبلک اکاؤنٹس کمیٹی کا چیئرمین بنانے کا مطلب ہے کہ کسی ملزم کو اس کے مقدمے کا جج لگا دیا جائے۔نجی ٹی وی چینل ’’ہم نیوز ‘‘ کے پروگرام ’پاکستان ٹونائٹ‘ میں گفتگو کرتے ہوئے صداقت عباسی کا کہنا تھا کہ ملک کا سب سے بڑا مسئلہ کرپشن کا ہے اور اس وقت پبلک اکاؤنٹس کمیٹی کا چیئرمین شہباز شریف کو بنانے کا مطلب ہے کہ کسی ملزم کو اس کے مقدمے کا جج لگا دیا جائے،حکومت اپوزیشن کو خوش کرے یا عوام کو، اپوزیشن کو خوش کرنے کے چکر میں ایسے فیصلے نہیں کیے جا سکتے۔انہوں نے مسلم لیگ ن کی حکومت کو شدید تنقید کا نشانہ بناتے ہوئے کہا کہ ان لوگوں نے بے پناہ کرپشن کی اور ملک کو قرضوں میں ڈبو دیا، ہم اس قرض کو اتارنے کی کوشش کر رہے ہیں۔
