نئی دہلی(سچ نیوز) بھارت میں قتل کی ایک ایسی انوکھی واردات ہوئی ہے جس میں ایک آدمی کی دوسری بیوی نے پہلی بیوی کی بیٹی اور اس کے آشنا کی مدد سے اس آدمی کی تیسری بیوی کو موت کے گھاٹ اتار دیا ہے۔ ٹائمز آف انڈیا کے مطابق یہ واردات بھارتی شہر ممبئی میں ہوئی ہے جہاں نالاسپارا کے علاقے سے 35سالہ یوگیتا دیوی کی لاش برآمد ہوئی۔ اس کی قاتل کی شناخت پاروتی مینی کے نام سے ہوئی ہے جسے پولیس نے گرفتار کر لیا ہے۔ یوگیتا 45سالہ سشیل مشرا کی تیسری جبکہ پاروتی دوسری بیوی تھی۔پولیس کے مطابق سشیل کی پہلی بیوی سے دو بیٹیاں تھیں۔ اس بیوی کی موت پر اس نے پاروتی سے شادی کی اور پھر اسے چھوڑ کر یوگیتا سے شادی کر لی۔ پاروتی جو اپنے شوہر کی پہلی بیوی سے پیدا ہونے والی بیٹیوں کے ساتھ رہ رہی تھی، شوہر کے چھوڑ جانے پر مشتعل تھی کہ وہ اس نے انہیں خرچہ دینا بھی بند کر دیا تھا۔ اس پر اس نے اپنی ان سوتیلی بیٹیوں میں ایک بیٹی اور اس کے بوائے فرینڈنیرج مشرا کو اپنے ساتھ ملایا اور یوگیتا کو قتل کر دیا۔وہ تینوں یوگیتا کے فلیٹ پر گئے، جہاں بلڈنگ کے سکیورٹی گارڈ کو انہوں نے مشروب دیا جس میں نشہ ملایا ہوا تھا۔ سکیورٹی گارڈ کے بے ہوش ہونے کے بعد وہ یوگیتا دیوی کے فلیٹ میں گئے، جس کی ایک چابی انہوں نے بنوا رکھی تھی۔ اس چابی سے انہوں نے دروازہ کھولا اور اندر داخل ہو گئے۔ اندر یوگیتا سو رہی تھی جسے انہوں نے سوتے میں ہی گلہ دبا کر قتل کر دیا۔ اس کے بعد نیرج مشرا، جو ایک رکشہ ڈرائیور تھا، نے لاش اٹھا کر اپنے رکشہ میں ڈالی اور اسے نالاسپارا کے ایک سنسان علاقے میں پھینک دیا۔
