”اگر پاکستان کی طرف سے دورے کی دعوت آتی ہے تو ہم ۔۔“افغان طالبان نے وزیراعظم عمران خان کیلئے پیغام جاری کر دیا

لاہور (سچ نیوز )وزیراعظم عمران خان کے امریکہ میں دیے گئے بیان پر افغان طالبان بھی میدان میں آ گئے ہیں اور پیغام جاری کر دیا ہے ۔بی بی سی کے مطابق افغان طالبان کا کہنا ہے کہ اگر پاکستان کی طرف سے انھیں دورے کی دعوت دی گئی تو وہ پاکستان جائیں گے اور وزیراعظم عمران خان سے ملیں گے۔قطر کے دارالحکومت دوحہ میں طالبان کے سیاسی دفتر کے ترجمان سہیل شاہین نے ٹیلی فون پر ”بی بی سی“ سے بات کرتے ہوئے کہا کہ اگر انھیں پاکستان کی طرف سے رسمی طور پر دعوت دی جائے تو وہ پاکستان جائیں گے۔ان کا کہنا تھا کہ ہم تو خطے اور ہمسایہ ممالک کے دورے وقتاً فوقتاً کرتے ہیں تو اگر ہمیں پاکستان کی طرف سے رسمی دعوت ملتی ہے، تو ہم جائیں گے کیونکہ پاکستان بھی ہمارا ہمسایہ اور مسلمان ملک ہے۔وزیراعظم عمران خان نے امریکہ کے حالیہ دورے میں کہا تھا کہ جب وہ پاکستان واپس جائیں گے تو طالبان سے ملیں گے تاکہ وہ افغان حکومت کے ساتھ مذاکرات کے لیے تیار ہوجائیں۔