افغان صوبے غزنی میں گھمسان کی جنگ ، عام شہریوں سمیت سینکڑوں افراد کے مارے جانے کی اطلاعات

کابل(سچ نیوز)افغان حکومت نے مشرقی شہر غزنی سے طالبان عسکریت پسندوں کو نکال باہر کرنے کے لیے اضافی فوجی کمک روانہ کر دی ہے۔ ذرائع نے بتایا کہ افغان فوج کی معاونت کے لیے امریکی فوجی مشیر اور جنگی طیارے بھی روانہ کیے گئے ہیں۔ غزنی میں گزشتہ چار ایام سے لڑائی جاری ہے اور عام شہریوں سمیت سینکڑوں افراد ہلاک ہو چکے ہیں۔ ہلاک ہونے والوں میں درجنوں افغان فوجی بھی شامل ہیں اور بے شمار لاپتہ ہو گئے ہیں۔ رپورٹوں کے مطابق غزنی شہر کے شمالی اور مغربی حصوں پر عسکریت پسندوں کا کنٹرول ہے۔ دوسری جانب افغان وزیر داخلہ واعظ برمک کا کہنا ہے کہ پیر کی شام سے صورت حال بہتر ہونا شروع ہو گئی ہے اور طالبان پسپا ہو رہے ہیں۔