تبلیسی(سچ نیوز)جارجیا کے حکام نے منی لانڈرنگ کے شبے میں ایرانی کرنسی ایکسچینج دفاتر سیل کردیے ہیں۔ حکام کا کہنا ہے کہ انہیں یہ اطلاعات ملی ہیں کہ ایرانی کرنسی ایکسچینج دفاتر ایرانی رجیم کے لیے منی لانڈرنگ کررہے ہیں۔ایرانی خبر رساں ادارے کے مطابق جارجیا کے حکام کا کہنا تھا کہ دارالحکومت تبلیسی میں ایرانی کرنسی ایکسچینج کے 12 مراکز بند کردیے گئے ۔ انسداد منی لانڈرنگ پولیس نے ایرانی ایکسچینج دفاتر پر چھاپے مارے اور وہاں سے اہم ریکارڈ قبضے میں لینے کے بعد دفاتر تا حکم ثانی بند کرنے کا حکم دیا گیا تھا۔جارجیا کے ذرائع ابلاغ کے مطابق انسداد کرپشن اور انسداد دہشت گردی کے حکام کے اشتراک سے کی گئی کارروائی میں ایرانی کرنسی ایکسچینج کے متعدد مراکز کو سیل کیا گیا ہے۔ ان مراکز پر ایران کو غیرقانونی طورپر رقوم کی ترسیل کا الزام عائد کیا گیا ہے۔
