نیویارک(سچ نیوز)اقوام متحدہ کے ذیلی ادارے ورلڈ فوڈ پروگرام (ڈبلیو ایف پی ) نے بتایاہے کہ خانہ جنگی کے شکار ملک یمن میں امدادی خوراک کی تقسیم کو تقریباً 2گنا کر دینے کی کوشش کی جا رہی ہے۔غیرملکی خبررساں ادارے کے مطابق ایک بیان میں کہاگیاکہ یمن میں خوراک کی تقسیم کا دائرہ8 لاکھ افراد سے بڑھا کر 14لاکھ تک کرنے کی منصوبہ بندی کو حتمی شکل دے دی گئی ہے۔ ورلڈ فوڈ پروگرام کے ایک ترجمان کے مطابق اتنی بڑی تعداد میں انسانوں کو خوراک کی فراہمی یقینی طور پر ایک بہت بڑا عمل ہو گا۔ ترجمان کے مطابق اس وسیع تر امدادی منصوبے کے لیے یمن کے اندر اور باہر ہر کسی کی مدد اور تعاون درکار ہوں گے۔
