نئی دہلی(ویب ڈیسک) بھارت میں ایک اور آشنا نے اپنی داشتہ کو بہیمانہ تشدد کرکے موت کے گھاٹ اتار ڈالا۔ انڈیا ٹائمز کے مطابق یہ واردات ریاست کرناٹک کے دارالحکومت بنگلورو میں ہوئی جہاں ویشنو نامی ملزم اور 24سالہ دیوی نامی مقتولہ باہم تعلق میں تھے اور اکٹھے رہ رہے تھے۔
ویشنو کو شبہ تھا کہ دیوی نے کسی اور شخص کے ساتھ بھی تعلقات استوار کر رکھے ہیں۔ اسی بات پر گزشتہ شام دونوں میں جھگڑا ہوا اور ویشنو نے پریشر ککر سے دیوی کو مار مار کر قتل کر دیا۔ پولیس کے مطابق ویشنو اور دیوی کا تعلق ریاست کیرالہ سے تھا۔ ان کے تعلق کو تین سال ہو چکے تھے جبکہ گزشتہ دو سال سے دونوں اکٹھے رہ رہے تھے۔
پولیس نے ویشنو کو گرفتار کر لیا ہے جس نے دوران تفتیش اعتراف کیا کہ دیوی کی ایک اور شخص کے ساتھ قربت اسے سخت ناپسند تھی اور وہ دیوی کو اس شخص سے ملنے سے منع کرتا تھا تاہم وہ باز نہ آئی۔ گزشتہ روز اسی بات پر جھگڑا ہوا اور اشتعال میں آ کر اس نے دیوی پر حملہ کر دیا۔ مقتولہ دیوی کی بہن کرشنا نے پولیس کو بتایا ہے کہ ویشنو اور دیوی کے مابین کچھ عرصے سے مسلسل جھگڑا رہنے لگا تھا۔ واردات کے روز دونوں کرشنا کے گھر گئے جہاں کرشنا نے انہیں کونسلنگ کا مشورہ دیا۔ اسی روز کرشنا کے گھر سے واپس اپنے اپارٹمنٹ میں آتے ہی دونوں میں ایک بار پھر جھگڑا ہوا جس میں ویشنو نے دیوی کو قتل کر دیا۔
